Շարունակվում է խստացված հսկողությունն ապօրինի շինարարությունների և հողազավթումների դեպքերը կանխարգելելու ուղղությամբ

Երևանի քաղաքապետարանում կայացած աշխատանքային հերթական խորհրդակցության ժամանակ, որը վարել է քաղաքապետ Տարոն Մարգարյանը, աշխատակազմի քաղաքաշինության և հողի վերահսկողության վարչության պետ Հայկ Ասատրյանը զեկուցել է, որ ապօրինի շինարարությունների և հողազավթումների կանխման և դրանց հետևանքների վերացման ուղղությամբ իրականացվող մշտական հսկողության շրջանակում նախորդ շաբաթ կազմվել է 2 վարչական արձանագրություն, մեկ հասցեում իրականացվել են քանդման աշխատանքներ: Հանձնարարվել է շարունակել խստացված հսկողությունը: 

 

Աշխատակազմի զարգացման և ներդրումային ծրագրերի վարչության պետ Տիգրան Սարգսյանն էլ զեկուցել է, որ շարունակվում են ներդրումային ծրագրերի մշակման աշխատանքները: Ներկայում Երևանի քաղաքապետարանի պաշտոնական էջում տեղադրված է 63 ներդրումային ծրագիր: 

Աշխատակազմի հանրակրթության վարչության պետ Գայանե Սողոմոնյանը զեկուցել է, որ  «Օգնիր դպրոցիդ» և «Օգնիր մանկապարտեզիդ» ծրագրերի միջոցով կատարված նվիրատվությունների շնորհիվ մայրաքաղաքի  դպրոցներում և մանկապարտեզներում շարունակվում են մասնակի նորոգման, բարեկարգման և գույքի ձեռքբերման աշխատանքները: Հանձնարարվել է հանրությանը պարբերաբար ներկայացնել այդ մասով կատարված աշխատանքները: 

Ճանապարհային ոստիկանության հետ համատեղ հասարակական տրանսպորտային միջոցների շահագործման նկատմամբ իրականացվող ամենօրյա հսկողության արդյունքում նախորդ շաբաթ կազմվել է 39 վարչական  արձանագրություն: Զեկուցվել է նաև, որ ի կատարումն քաղաքապետ Տարոն Մարգարյանի հանձնարարականի` շարունակվում է խստացված հսկողությունը մայթերին և կամարանցումներում մեքենաների կայանման, ինչպես նաև ավտոկայանատեղերում կայանման համար ապօրինի գումարների գանձման դեպքերը բացառելու ուղղությամբ: Նախորդ շաբաթ այս մասով վարչական պատասխանատվության է ենթարկվել 4 իրավախախտ: 

Շարունակվում է նաև ամենօրյա հսկողությունը չնախատեսված վայրերում աղբը թափելու դեպքերի հայտնաբերման, կանխարգելման և իրավախախտներին վարչական պատասխանատվության ենթարկելու ուղղությամբ: Այս մասով զեկուցվել է, որ նախորդ շաբաթ կազմվել է 3 վարչական արձանագրություն: 

Շարունակական հսկողություն է իրականացվում նաև ֆիզիկական և իրավաբանական անձանց կողմից Երևանի ավագանու` պարտադիր բարեկարգման, առևտրի և սպասարկումների վերաբերյալ որոշումների պահանջների կատարման նկատմամբ: Զեկուցվել է, որ նախորդ շաբաթվա ընթացքում արձանագրվել է 3 դեպք: Վերոնշյալ բոլոր ուղղություններով հանձնարարվել է լինել առավել հետևողական և խստացնել հսկողությունը:

 

27.02.17 | քաղաքականություն