Նախընտրական զարգացումներ Գորիսում. Սամվել Հարությունյանը պահանջում է ուժը կորցրած ճանաչել Առուշ Առուշանյանի գրանցումը. Լուսանկարներ

Գորիս համայնքի ղեկավարի արտահերթ ընտրությանը, որ տեղի կունենա նոյեմբերի 5-ին, նախորդում է անակնկալների անվերջանալի մի շարք:

 















 

Այսօր՝ հոկտեմբերի 30-ին, ժամը 15-ին, տեղի կունենա թիվ 34 տարածքային ընտրական հանձնաժողովի նիստ: Կքննարկվի Գորիս համայնքի ղեկավարի թեկնածու Սամվել Հարությունյանի դիմումը, որով պահանջվում է անվավեր ճանաչել մրցակից Առուշ Առուշանյանի գրանցումը որպես Գորիս համայնքի ղեկավարի թեկնածու:

 

 

Ի՞նչ փաստարկների ուժով է պահանջվում թեկնածուի գրանցման չեղարկում:

 

 

Ըստ Սամվել Հարությունյանի՝ իր մրցակիցը «Գորիսի զարգացման գոյություն չունեցող հիմնադրամի անունից, սոցիալապես ծանր վիճակում գտնվող հազարավոր գորիսեցիների բարեգործություն անելու անվան տակ, հիսուն դրամանոց ընտրակաշառք-ծառայություն է մատուցում ընտրողներին», որի հետեւանքները հնարավոր չեն վերացնել, եւ դրանք ազդելու են ընտրությունների արդյունքների վրա:

 

 

Ա.Առուշանյանը, ըստ Ս.Հարությունյանի, քարոզչական նյութեր է տեղադրել Գորիսի համայնքապետարանի պատերին, իսկ իր նախընտրական գլխավոր շտաբը տեղակայել է համայնքապետարանի ենթակա մշակույթի կենտրոնում, ինչն արգելված է օրենքով:

 

 

Իսկ ի՞նչ լիազորություններ ունի տարածքային ընտրական հանձնաժողովը նման իրավիճակում:

Նախ՝ հանձնաժողովը պետք է ստուգի (մյուս կողմի փաստարկված հիմնավորումները լսելով)՝ արդյո՞ք դիմումատուի վկայակոչած փաստերը եւ խախտումները հավաստի են:

 

 

Եթե հավաստի են, ապա Առուշ Առուշանյանին կտրվի հնարավորություն՝ ողջամիտ ժամկետում դրանք վերացնելու համար:

 

 

Իսկ եթե կատարված գործողությունների հետեւանքներն այլեւս հնարավոր չեն վերացնել, եթե այդ գործողություններն արդեն իսկ էական ազդեցություն են ունեցել ընտրությունների ընթացքի վրա, ապա հանձնաժողովը պետք է դիմի վարչական դատարան՝ թեկնածուի գրանցումն ուժի մեջ թողնելու կամ չեղարկելու համար:

 

 

Ավելի կոնկրետ՝ հանձնաժողովը համայնքի ղեկավարի թեկնածուի գրանցումն ուժը կորցրած է ճանաչում դատական ակտի հիման վրա՝ ՀՀ ընտրական օրենսգրքի 19-րդ հոդվածի 8-րդ մասով, որը սահմանում է՝ «Եթե առկա է նախընտրական քարոզչության սահմանված կարգի այնպիսի խախտում, որը կրում է շարունակական բնույթ, եւ թույլ տրված խախտումը կարող է էական ազդեցություն ունենալ ընտրությունների արդյունքների վրա, կամ թույլ տրված խախտման հետեւանքները հնարավոր չէ վերացնել, եւ թույլ տրված խախտումը կարող է էական ազդեցություն ունենալ ընտրությունների արդյունքների վրա, ապա թեկնածուին, ընտրություններին մասնակցող կուսակցության ընտրական ցուցակը գրանցած ընտրական հանձնաժողովը դիմում է դատարան` թեկնածուի, ընտրություններին մասնակցող կուսակցության ընտրական ցուցակի գրանցումն ուժը կորցրած ճանաչելու համար: Դատարանը թեկնածուի, ընտրություններին մասնակցող կուսակցության ընտրական ցուցակի գրանցումն ուժը կորցրած կարող է ճանաչել, եթե հանգում է այն եզրակացության, որ խախտումը կատարվել կամ ուղղորդվել է թեկնածուի կամ ընտրություններին մասնակցող կուսակցության կողմից»:

 

 

Եթե թիվ 34 տարածքային ընտրական հանձնաժողովը հստակ որոշում չընդունի բողոքի վերաբերյալ, ապա կողմերը կարող են հանձնաժողովի որոշումը բողոքարկել ՀՀ վարչական դատարանում:

 

 

Թե ինչ ընթացք կունենա հարցի քննարկումը՝ կիմանանք օրվա ավարտին:

 

 

Հիշեցնենք նաեւ, որ Սամվել Հարությունյանը նոյեմբերի 5-ի ընտրությունների առիթով դիմումներ է հղել Հայաստանի Հանրապետությունում հավատարմագրված օտարերկրացի դեսպաններին ու միջազգային կառուցների հայաստանյան ներկայացուցիչներին, ՀՀ խորհրդարանական ուժերի ղեկավարներին՝ ակնկալելով սեւեռուն ուշադրություն Գորիսի ընտրություններին եւ այդ նպատակով դիտորդական առաքելությունների կազմակերպում: ՀՀ վարչապետին հղած դիմումի միջոցով էլ Կարեն Կարապետյանի ուշադրությունն է հրավիրվել իր մրցակցի հայտարարագրի վերաբերյալ «Հետք» էլեկտրոնային թերթի 2017թ. հոկտեմբերի 26-ի հրապարակման վրա:

 

syuniacyerkir.am

 

Նյութին կից լուսանկարները Նոյյան Տապանին է տրամադրել Գորիս համայնքի ղեկավարի թեկնածու Սամվել Հարությունյանը

30.10.17 | քաղաքականություն