Համշէնահայ ընտանիքին ոդիսականը

Համշէնահայ մտաւորական Ճեմիլ Աքսու ու կինը՝ Նուրճան Վահիչ Աքսու, հասարակական ցանցերէն մէկուն վրայ Թուրքիոյ պետութիւնը քննադատող հրապարակումներ կատարած ըլլալու ամբաստանութեամբ վերջերս ձերբակալուած են:

 

Ճեմիլ Աքսուի ձերբակալութենէն օր մը ետք՝ ոստիկանութիւնը գրոհ կազմակերպած ու խուզարկած է անոր եւ իր նման՝ համշէնցի գործիչ իր կնոջ բնակարանը: Նուրճան Վահիչ Աքսու եւս ձերբակալուած է, իսկ անոր համակարգիչն ու անձնական շարք մը գիրքերը գրաւուած են:

Թրքական gazeteduvar.com.tr կայքէջի լրագրողներէն Պիրսեն Քայա կը գրէ, որ համշէնահայ գործիչներու երախան՝ փոքրիկ Արեւը, ծնողներու ձերբակալութեան ու բանտարկութեան հետեւանքով մինակ մնացած է:

«Մենք յետագային ինչպէ՞ս Արեւին պիտի պատմենք այս օրերուն մասին, ի՞նչ պատասխան պիտի տանք, այսօրուան պետական պաշտօնեաները վաղը ինչպէ՞ս պիտի նային Արեւի աչքերուն մէջ», գրած է լրագրողը:

Ըստ Քայայի՝ Ճեմիլի ու Նուրճանի ձերբակալութեան հրամանը «շատ բարձր տեղերէ» ստացուած է:

«Ճեմիլը Հոփայի մէջ բոլորին աչքն ու ականջն է, մտաւորական է, գործիչ, գրող: Նուրճանն ալ բոլորին կողմէ ճանչցուած ու սիրուած, աշխատող, քարէն հաց հանող, նոյն ատեն քաղաքականութեան մէջ ալ դեր խաղացած կին է: Օրինակ՝ Թուրքիոյ մէջ սեռային ոտնձգութեան դէմ ամենահզօր հանրահաւաքներէն մէկը կազմակերպած հոփացի կիներու շարքին էր ան», կը գրէ Քայա:

Նշենք, որ Ճեմիլ Աքսու ժամանակին արդէն շուրջ 9 տարի բանտարկուած է քաղաքական իր հայեացքներուն պատճառով։

 

ՆՅ 

 

 

30.10.17 | քաղաքականություն